امداد صابری ہندوستان کے نامور صحافی، مجاہد آزادی، کونسلر اور دلی کے سابق نائب ناظم (ڈپٹی میئر) تھے۔ انہیں تحریر و تقریر دونوں فن میں کمال حاصل تھا۔ ان کی مشہور تصنیفات میں تاریخ صحافت اردو، تاریخ آزاد ہند فوج، دہلی کی یادگار شخصیتیں اور فرنگیوں کا جال قابل ذکر ہیں۔ انہوں نے تقریباً پچاس برس اردو اور خصوصاً اُردو صحافت کی ناقابل فراموش خدمات انجام دیں ہیں۔ "تاریخ صحافت اردو" امداد صابری کی تحقیقی کتاب ہے۔ سنہ ۱۹۴۷ ء کے پر آشوب زمانے میں اس کتاب کی پہلی جلد شائع ہوئی ۔جو بہت مقبول ہوئی ، خوب داد و تحسین سے نواز ا گیا ۔ بقول مصنف اس کتاب کو ابوالکلام آزاد نے پڑھا تو فرمایا "یہ کام تمہارا زندہ جاوید ہے۔" یہ کتاب کئی جلدوں میں ہے۔ زیر تبصرہ جلد سوم ہے۔ اس حصہ میں سنہ ۱۸۷۶ سے ۱۹۰۰ تک کے اخبارات کی تاریخ ،ایڈیٹرز کی سوانح عمری اور اس دور کے تاریخی ،سیاسی ،سماجی و ادبی حالات درج کیے گئے ہیں۔ کتاب کا انتساب حسرت موہانی کے نام کیا ہے۔ فہرست مضامین کتاب کے آخر میں ہے۔