آج بھی ہم اپنے بیگانے کو پہچانے کہاں

آج بھی ہم اپنے بیگانے کو پہچانے کہاں

سب وہی رہبر ہیں پھر اب چھوڑ دیں جانے کہاں

تم سے دانشور کہاں اور ہم سے دیوانے کہاں

مخملی تلووں کو راس آئیں گے ویرانے کہاں

سمت ہی کوئی مقرر ہے نہ منزل کا پتہ

جا کے ٹھہرے قافلہ اپنا خدا جانے کہاں

آپ کیسے مہرباں ہو کر یہاں تک آ گئے

اس طرح آتا ہے کوئی پھول برسانے کہاں

شہر جو لوٹے گئے ہوں ان کا منظر دیکھیے

خوفناک اتنے بھلا ہوتے ہیں ویرانے کہاں

ہر طرف تو ذکر تھا اس کے لب و رخسار کا

لوگ سنتے میری بربادی کے افسانے کہاں

ہر طرف شاداںؔ نظر آتے ہیں چہرے اجنبی

ہم نکل کر گھر سے جائیں ٹھوکریں کھانے کہاں