aankh rakhte hue tauhin-e-nazar kaun kare

aañkh rakhte hue tauhīn-e-nazar kaun kare

naav TuuTī huī dekhe to safar kaun kare

sab yahāñ paar utarne ke liye baiThe haiñ

sāmnā tund-havāoñ kā magar kaun kare

laash be-gor-o-kafan kab se paḌī hai bāhar

sabhī qātil hoñ to bastī meñ ḳhabar kaun kare

log jangal ke daraḳhtoñ ko uThā le ga.e ghar

dhuup meñ jalte parindoñ pe nazar kaun kare

duur tak raah meñ chhāyā hai ḳhizāñ kā manzar

ḳhvāb āñkhoñ meñ na mahke to safar kaun kare

jhilmilā de tujhe ik mauj-e-havā kī aahaT

sham.a-e-be-māya tire saath sahar kaun kare

imtihān-e-dil-o-jāñ hai ye mohabbat kī salīb

sahl ho ma.arka-e-shauq to sar kaun kare

aaj lafzoñ kā bharam TuuT gayā hai 'qaisar'

ham bhī naqqād haiñ tanqīd magar kaun kare

aankh rakhte hue tauhin-e-nazar kaun kare

naw TuTi hui dekhe to safar kaun kare

sab yahan par utarne ke liye baiThe hain

samna tund-hawaon ka magar kaun kare

lash be-gor-o-kafan kab se paDi hai bahar

sabhi qatil hon to basti mein KHabar kaun kare

log jangal ke daraKHton ko uTha le gae ghar

dhup mein jalte parindon pe nazar kaun kare

dur tak rah mein chhaya hai KHizan ka manzar

KHwab aankhon mein na mahke to safar kaun kare

jhilmila de tujhe ek mauj-e-hawa ki aahaT

shama-e-be-maya tere sath sahar kaun kare

imtihan-e-dil-o-jaan hai ye mohabbat ki salib

sahl ho marka-e-shauq to sar kaun kare

aaj lafzon ka bharam TuT gaya hai 'qaisar'

hum bhi naqqad hain tanqid magar kaun kare