آشوب روزگار ستائے تو کیا کریں

آشوب روزگار ستائے تو کیا کریں

ہم دل جلوں کو اور جلائے تو کیا کریں

ظالم تھے غیر غیر تھے غیروں کا ذکر کیا

اپنے ہی گھر میں چین نہ آئے تو کیا کریں

دشمن نظر اٹھائے تو آنکھیں نکال لیں

بھائی کو بھائی آنکھ دکھائے تو کیا کریں

وہ دل نواز جس پہ ابھی دل کو ناز ہے

دشمن نواز بن کے دکھائے تو کیا کریں

ہم چاہتے تو ہیں کہ سکوں آشنا رہیں

دل ہی اگر قرار نہ پائے تو کیا کریں

اپنا بنا کے دوست ہی ماریں وطن سے دور

قسمت اگر یہ دن بھی دکھائے تو کیا کریں

زیدیؔ ہمیں تو عہد وفا کا خیال ہے

اس بے وفا کو شرم نہ آئے تو کیا کریں