آسمان خواب کی رنگیں بیانی جا چکی

آسمان خواب کی رنگیں بیانی جا چکی

دوستو دل تھام لینا شادمانی جا چکی

اب کہاں داد و دہش کی وہ تمنا خوشبوؤ

موسم بے رنگ تک اک اک کہانی جا چکی

گنبد بے در کی آنکھوں میں بھی آنسو آ گئے

دور تک شاید ہماری نوحہ خوانی جا چکی

خود سے ملنا تو ہمیشہ ہی رہا آزار جاں

تم سے ملنے کی بھی خواہش یار جانی جا چکی

آسماں سے سنگ ریزے آ رہے ہیں سر پہ کیوں

اس جہاں سے کیا ہماری میہمانی جا چکی

اب کہاں ہنستے ہیں چہرے اب کہاں کھلتے ہیں پھول

میری آنکھوں میں جو تھی اس کی نشانی جا چکی