اب ترا ظلم و ستم بار ہوا جاتا ہے

اب ترا ظلم و ستم بار ہوا جاتا ہے

دل کہ آمادۂ پیکار ہوا جاتا ہے

تو جسے جیت کے خانے میں بٹھا کر خوش ہے

وہی مہرہ تو تری ہار ہوا جاتا ہے

ایک زندانی کی ہلکی سی بغاوت سے ترا

سارا زندان ہی جھنکار ہوا جاتا ہے

کوشش ضبط کی پابند زباں ہے لیکن

ایک اک لفظ گراں بار ہوا جاتا ہے

اتنی نفرت میں محبت کو پکاریں کیسے

کام آساں ہے پہ دشوار ہوا جاتا ہے

بے زمینی کی خلش کانچ سی چبھتی ہے غزلؔ

اور یہ غم غم پندار ہوا جاتا ہے