اگر دماغ سے باغی ہوئے نہیں ہوتے

اگر دماغ سے باغی ہوئے نہیں ہوتے

دل و نظر کے حسیں سلسلے نہیں ہوتے

عجیب بات ہے پی کر بھی روشنی کا لہو

مری زمین کے پودے ہرے نہیں ہوتے

اگر لہو نہیں کرتا میں اپنے پاؤں یہاں

تری زمیں پہ کہیں راستے نہیں ہوتے

یہ لوگ عجز کی تاثیر سے نہیں واقف

اسی لئے تو یہاں معجزے نہیں ہوتے

نہ کر تلاش مقدر کا آسماں ان پر

ہتھیلیوں پہ ستارے جڑے نہیں ہوتے

یہ ارد گرد کی موجودگی تو برحق ہے

مگر وہ لوگ جو ہوتے ہوئے نہیں ہوتے

مجھے بتائے سبب کوئی ناگہانی کا

بلا جواز اگر حادثے نہیں ہوتے

ہم اصل شکل بہر کیف دیکھتے عاصمؔ

فریب خیز اگر آئنے نہیں ہوتے