ajab nahin ki phir ek bar main badal jaun

'ajab nahīñ ki phir ik baar maiñ badal jā.ūñ

zamīñ se duur kahīñ aur hī nikal jā.ūñ

purāne vaqt kā sikka huuñ mujh ko pheñk na de

bure dinoñ meñ ye mumkin hai maiñ bhī chal jā.ūñ

tire badan meñ kahīñ raushnī kā naam nahīñ

utar hī jā.ūñ badan meñ tire maiñ jal jā.ūñ

mujhe nahīñ to kisī aur ko to kāTegā

ye saañp hai to ise maar kar nikal jā.ūñ

ḳhudā gavāh bahut thak gayā huuñ ro ro kar

koī to pyaar se dekhe ki maiñ bahal jā.ūñ

na kaam aa.egā ye gosht kā badan 'alvī'

mashīnī daur hai lohe meñ kyoñ na Dhal jā.ūñ

'ajab nahin ki phir ek bar main badal jaun

zamin se dur kahin aur hi nikal jaun

purane waqt ka sikka hun mujh ko phenk na de

bure dinon mein ye mumkin hai main bhi chal jaun

tere badan mein kahin raushni ka nam nahin

utar hi jaun badan mein tere main jal jaun

mujhe nahin to kisi aur ko to kaTega

ye sanp hai to ise mar kar nikal jaun

KHuda gawah bahut thak gaya hun ro ro kar

koi to pyar se dekhe ki main bahal jaun

na kaam aaega ye gosht ka badan 'alwi'

mashini daur hai lohe mein kyon na Dhal jaun