aql dauDai bahut kuchh to guman tak pahunche

aql dauḌā.ī bahut kuchh to gumāñ tak pahuñche

kuchh haqīqat bhī hai insāñ kī kahāñ tak pahuñche

ishq ke sho.ale bhaḌak kar rag-e-jāñ tak pahuñche

aag sī aag hai ye aag jahāñ tak pahuñche

laḌ ga.ī un se nazar khich ga.e abrū un ke

ma.arke ishq ke ab tīr-o-kamāñ tak pahuñche

dil se bāhar ho tirā raaz gavārā hai kise

ye koī baat nahīñ hai ki zabāñ tak pahuñche

maar le vo nigah-e-nāz to rutba ho buland

sar ho ūñchā mirā gar nok-e-sināñ tak pahuñche

koī dīvāngī-e-ishq kā qissa chheḌe

silsila us kā ḳhudā jaane kahāñ tak pahuñche

surḳhī-e-ḳhār-e-bayābāñ ye pata detī hai

ki udhar se tire dīvāne yahāñ tak pahuñche

riñd pur-kaif ba-yak-gardish-e-chashm-e-sāqī

ġhāyat-e-dā.era-e-kaun-o-makāñ tak pahuñche

ruḳh se parde ko haTā husn-e-yaqīñ tak pahuñchā

āḳhir insān huuñ yuuñ aql kahāñ tak pahuñche

raah meñ aur bhī dīvānoñ se milte julte

pūchhte pūchhte ham un ke makāñ tak pahuñche

sharbat-e-dīd na ho teġh kā paanī hī sahī

koī ThanDak to mire qalb-e-tapāñ tak pahuñche

le ga.e ishq kī baazī pa safā.ī 'betāb'

jaan par khel ga.e jān-e-jahāñ tak pahuñche

aql dauDai bahut kuchh to guman tak pahunche

kuchh haqiqat bhi hai insan ki kahan tak pahunche

ishq ke shoale bhaDak kar rag-e-jaan tak pahunche

aag si aag hai ye aag jahan tak pahunche

laD gai un se nazar khich gae abru un ke

marke ishq ke ab tir-o-kaman tak pahunche

dil se bahar ho tera raaz gawara hai kise

ye koi baat nahin hai ki zaban tak pahunche

mar le wo nigah-e-naz to rutba ho buland

sar ho uncha mera gar nok-e-sinan tak pahunche

koi diwangi-e-ishq ka qissa chheDe

silsila us ka KHuda jaane kahan tak pahunche

surKHi-e-KHar-e-bayaban ye pata deti hai

ki udhar se tere diwane yahan tak pahunche

rind pur-kaif ba-yak-gardish-e-chashm-e-saqi

ghayat-e-daera-e-kaun-o-makan tak pahunche

ruKH se parde ko haTa husn-e-yaqin tak pahuncha

aaKHir insan hun yun aql kahan tak pahunche

rah mein aur bhi diwanon se milte julte

puchhte puchhte hum un ke makan tak pahunche

sharbat-e-did na ho tegh ka pani hi sahi

koi ThanDak to mere qalb-e-tapan tak pahunche

le gae ishq ki bazi pa safai 'betab'

jaan par khel gae jaan-e-jahan tak pahunche