ارے توبہ عذر جفا کروں کبھی ظرف ایسا مرا نہیں

ارے توبہ عذر جفا کروں کبھی ظرف ایسا مرا نہیں

وہ مٹا دیں چاہے ابھی مجھے کوئی شکوہ گلہ نہیں

تو اٹھا دے پردہ تو دیکھ لوں کسے ہوش ہے تجھے دیکھ کر

ابھی ہر نگاہ ہے مدعی کوئی پردہ جبکہ اٹھا نہیں

میں سمجھ گیا جو ہے کعبہ میں مجھے اتفاق ہے دیر سے

میں فریب جلوہ نہ کھاؤں گا کوئی اور تیرے سوا نہیں

مجھے ذوق عذر ستم سہی مگر اس کا اتنا ملال کیوں

جو گلہ بھی ہے وہ ہے آپ سے کسی غیر سے تو گلہ نہیں

وہ بری کٹے مری زندگی مجھے فکر اس کی نہیں شفیعؔ

وہ بگڑ کے میرا کریں گے کیا کوئی بت یہ میرے خدا نہیں