اسیر دام حریفاں ہیں آپ بھی ہم بھی
اسیر دام حریفاں ہیں آپ بھی ہم بھی
حقیقتوں سے گریزاں ہیں آپ بھی ہم بھی
فساد موسم برق و شرر گزر جائے
تو میر صبح درخشاں ہیں آپ بھی ہم بھی
مزاج غنچہ و گل ہم اگر سمجھ جائیں
تو پھر خدائے گلستاں ہیں آپ بھی ہم بھی
اب اور اپنے دکھوں میں نہ ہم اضافہ کریں
کہ دکھ سے دست و گریباں ہیں آپ بھی ہم بھی
چلو کہ سوزن مژگاں سے چاک دل سی لیں
گدائے بے سر و ساماں ہیں آپ بھی ہم بھی
چلو ردائے محبت سے جسم و جاں ڈھانپیں
ہجوم دہر میں عریاں ہیں آپ بھی ہم بھی
چلو کہ ہم نئے سانچے میں زندگی ڈھالیں
عداوتوں سے پریشاں ہیں آپ بھی ہم بھی
چلو کہ دونوں چمن خوشبوؤں سے مہکا دیں
نسیم امن کے خواہاں ہیں آپ بھی ہم بھی
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
