بدنام ہوا آپ پہ الزام نہ آیا

بدنام ہوا آپ پہ الزام نہ آیا

اک دل کے سوا کوئی مرے کام نہ آیا

آنکھوں میں کچھ آنسو تو ضرور آئے ہیں لیکن

ہونٹوں پہ بہرحال ترا نام نہ آیا

سایہ ہی مرا صرف مرے ساتھ رہا ہے

اس دھوپ میں چل کر کوئی دو گام نہ آیا

لہرائی کوئی زلف تو گھر آئیں گھٹائیں

مجھ تک تو سر بزم کوئی جام نہ آیا

صد شکر شب وعدہ نہ تھی اور چلے آئے

صد حیف وہ دن جب کوئی پیغام نہ آیا

وہ میری خلش ہو کہ تمنا کہ ترا پیار

سائے کی طرح کوئی تہ دام نہ آیا

کیا جانئے کیا بیت گئی جان پہ اس کی

وہ صبح کا بھولا جو سر شام نہ آیا

جلنا تو سراجؔ اپنے لیے وجہ سکوں ہے

جس شب نہ جلے صبح تک آرام نہ آیا