بہلنے لگی ہے ذرا سی نمی سے

بہلنے لگی ہے ذرا سی نمی سے

بھروسہ ہی اٹھنے لگا تشنگی سے

بہت بے نیازی دکھائی تھی ہم نے

سو وہ بھی جدا ہو گیا بے رخی سے

بہت دن کا غصہ اتارا کسی نے

اچانک الگ ہو گیا زندگی سے

تمہیں ہم سناتے ہیں اپنی کہانی

مگر اس کا چرچا نہ کرنا کسی سے

تمہارے لیے غم اٹھانے پڑیں گے

تمہیں ہم نے چاہا ہے اپنی خوشی سے

اب اس کے پلٹنے کا امکاں نہیں ہے

وہ اٹھ کر گیا ہے بڑی بے دلی سے

ہمیں آج اپنے اندھیرے ملے ہیں

مخاطب ہوئے ہیں نئی روشنی سے