بھلا لگائیں بھی دل کس طرح کسی سے ہم

بھلا لگائیں بھی دل کس طرح کسی سے ہم

پریشاں ہو چکے ہیں اس کی بے رخی سے ہم

ہر ایک شخص پہ کرتے ہیں اعتبار بہت

کہیں نہ جان گنوا دیں اسی کمی سے ہم

بھڑکتی آگ کے شعلوں میں ہاتھ ڈالیں گے

لگائے بیٹھے ہیں یہ شرط زندگی سے ہم

کہا تھا اس نے کبھی گھر تمہارے آئیں گے

سجانے بیٹھ گئے اپنا گھر ابھی سے ہم

ابھی تو سامنے آیا نہیں ہے وہ چہرہ

ابھی سے ڈرنے لگے تیز روشنی سے ہم

ہنر ہمارا بھی چارہ گری سے کم تو نہیں

دلوں کے زخموں کو بھرتے ہیں شاعری سے ہم