بھٹکنے دو روانہ کیوں کیا تھا

بھٹکنے دو روانہ کیوں کیا تھا

مجھے بے آشیانہ کیوں کیا تھا

کسی دن چھوڑ دینا تھا یہ رستہ

تو اتنا آنا جانا کیوں کیا تھا

ہمارے عشق کا انجام سن کر

یہ کہتا ہے زمانہ کیوں کیا تھا

بچھڑنا تھا اگر منزل پہ آ کر

سفر شانہ بہ شانہ کیوں کیا تھا

بسانا تھا تمہیں ویرانہ کوئی

تو بستی میں ٹھکانہ کیوں کیا تھا

حیا آتی ہے میرا نام سن کر

تو رسوائے زمانہ کیوں کیا تھا

تمہیں انور شعورؔ آخر خدا نے

ہزاروں میں یگانہ کیوں کیا تھا