بلا رہا ہے مجھے رہ گزار اپنی طرف

بلا رہا ہے مجھے رہ گزار اپنی طرف

ہوا کو کھینچ رہا ہے غبار اپنی طرف

مجھے کسی کی طرف دیکھنا نہیں پڑتا

میں دیکھ لیتا اگر ایک بار اپنی طرف

پڑا ہوا تھا میں برگ خزاں رسیدہ سا

اڑا کے لے گئی باد بہار اپنی طرف

سوال یہ ہے کہ اب کس طرح وصول کروں

نکل رہا ہے مرا کچھ ادھار اپنی طرف

جو دل میں آئی کبھی رفتگاں سے ملنے کی

قدم اٹھے مرے بے اختیار اپنی طرف

نہ جانے آج کدھر کو نکل گیا غائرؔ

تری طرف ہی وہ پہنچا نہ یار اپنی طرف