چمن میں بلبلوں کے جھرمٹ کبھی ادھر کو کبھی ادھر کو

چمن میں بلبلوں کے جھرمٹ کبھی ادھر کو کبھی ادھر کو

اسی سے ہے گل کو بھی لگاوٹ کبھی ادھر کو کبھی ادھر کو

یہ کہیو دیکھا کیا ہوں ظالم اٹھا کے بالیں سے سر کو ہر دم

سمجھ کے پاؤں کی تیرے آہٹ کبھی ادھر کو کبھی ادھر کو

تری جدائی میں رات ساری صبا یہ کہنا بہ آہ و زاری

بدلتے گزری ہے مجھ کو کروٹ کبھی ادھر کو کبھی ادھر کو

بھلا بتاؤ تو خلق کیوں کر دو رستہ رکھیں نہ ہات دل پر

لڑاتا ہے انکھڑیاں وہ نٹ کھٹ کبھی ادھر کو کبھی ادھر کو

گیا جو گلشن میں میرا گل رو تو کلیاں پھولوں کی پا کے قابو

بلائیں لیتی ہیں اس کی چٹ چٹ کبھی ادھر کو کبھی ادھر کو

کبھی یہ بیدل کبھی وہ بیدل صفائی ہونی ہے ان میں مشکل

رہے گی باہم یوں ہی رکاوٹ کبھی ادھر کو کبھی ادھر کو

یہ کہہ دو عاشق کا اس صنم سے دل و جگر اب خراش غم سے

گرے ہے اشکوں کے ساتھ کٹ کٹ کبھی ادھر کو کبھی ادھر کو

یہ ہے نشیب و فراز دنیا عبث ہے اس کا خیال کرنا

جہاں میں ہوتے ہیں یوں ہی جمگھٹ کبھی ادھر کو کبھی ادھر کو

جو دیکھے کالا تو کھا مرے سم یہ اس کے مکھڑے پہ عیشؔ جس دم

ہوا سے ہوتی ہے زلف کی لٹ کبھی ادھر کو کبھی ادھر کو