چھپ کے نظروں سے مرے دل میں سمانے والے

چھپ کے نظروں سے مرے دل میں سمانے والے

اب تجھے ڈھونڈ نہ پائیں گے زمانے والے

اختلافات محبت تو بجا ہیں پھر بھی

یاد آتے ہیں بہت روٹھ کے جانے والے

مے پرستی پہ یہ ایمان یہ جذبہ یہ خلوص

کیا عجب لوگ ہیں یہ پینے پلانے والے

ان کے وعدوں پہ نہ جا اے دل بیتاب نہ جا

ایسے آیا نہیں کرتے کبھی جانے والے

مجھ کو ڈر ہے کہیں پھولوں سے نہ کھو جائے تو

رخ سے پردہ نہ اٹھا باغ میں آنے والے

جو بنے پھرتے تھے اردو کے محافظ عشرتؔ

وہی نکلے اسے بھارت سے مٹانے والے