چوم لو اس ہاتھ کو جو ہاتھ بک جاتا نہ ہو

چوم لو اس ہاتھ کو جو ہاتھ بک جاتا نہ ہو

وقت کی سچائیاں لکھنے سے گھبراتا نہ ہو

حادثہ یہ ہے کہ میری پیاس نے باندھی ہے آس

ایسے بادل سے برسنا ہی جسے آتا نہ ہو

کوئی راہی اتنا بھی بے بس نہیں ہوتا جسے

کوئی آنسو کوئی جگنو راہ دکھلاتا نہ ہو

اس کا امکاں ہے کہ اس شہر سراب و خواب میں

جس کو پا لیتا ہو انساں اس کو بھی پاتا نہ ہو

کوئی دن ایسا نہیں اے خوبصورت زندگی

جب مری آنکھوں میں تیرا روپ لہراتا نہ ہو

دل میں ارماں لے کے چلتا ہو تو ممکن ہی نہیں

آدمی شیشے سے یا پتھر سے ٹکراتا نہ ہو

وہ کوئی تصویر ہے جس میں نہ ہو رنگ وفا

وہ کوئی منظر ہے جو آنکھوں کو بہلاتا نہ ہو

اک ارادہ ہے جنوں ہے اک سفر ہے زندگی

حادثوں سے وہ ڈرے جینا جسے آتا نہ ہو

ایسے سورج سے تو مٹی کا دیا اچھا بشیرؔ

ایسا سورج جو کسی آنگن تلک جاتا نہ ہو