دامن بچا کے شوق سے غصہ اتاریے

دامن بچا کے شوق سے غصہ اتاریے

کیچڑ میں سانپ کو بھی نہ پتھر سے ماریے

پھر کیجئے گا شکوۂ ملبوس زندگی

پہلے خود اپنے جسم کی حالت سنواریے

بہتر یہی ہے آپ جہاں ہیں وہیں رہیں

ٹیلے پہ چڑھ کے قد کو نہ اپنے ابھاریے

میں گر گیا تو آپ پہ الزام آئے گا

اتنی بلندیوں سے مجھے مت پکاریے

یوں لگ رہا ہے جیسے کوئی اجنبی ہوں میں

اتنے تپاک سے تو نہ مجھ کو پکاریے

ایسی ہی احتیاج اگر ہے تو اے مشیرؔ

دامن کسی شریف کے آگے پساریے