درد ملے تو رنج ہی کیا ہے

درد ملے تو رنج ہی کیا ہے

درد بھی دل کی ایک دوا ہے

جس نے مجھ کو درد دیا ہے

اس نے تو احسان کیا ہے

اس کو جب تک دیکھ نہ لوں میں

دل کو سکون کہاں ملتا ہے

رات گزرنے والی ہے جی

دل کا غبار نہیں نکلا ہے

دل کا برتن جب سے ٹوٹا

پانی آنکھ میں بھر رکھتا ہے

میں کب تک مدہوش رہوں گا

ان آنکھوں سے جام پیا ہے

سارے تارے دیکھ رہے ہیں

چندا مجھ کو گھور رہا ہے

کتنے لوگ تھے دل میں صاحب

اب تو دل ویران پڑا ہے

یادوں کی بارش میں صادقؔ

کب سے بیٹھا بھیگ رہا ہے