دست وحشت سے ذرا اور سنواریں گے تجھے

دست وحشت سے ذرا اور سنواریں گے تجھے

اپنے انداز میں اے ہجر گزاریں گے تجھے

گر ہمیں نیند نہ آئی تو یہ طے ہے جاناں

تیرے دروازے پہ جائیں گے پکاریں گے تجھے

اے محبت تجھے تا حشر نبھائیں گے ہم

اتنی جلدی کہاں پلکوں سے اتاریں گے تجھے

جس بھی لمحے میں تجھے جینے کی حسرت ہوگی

ہم اسی لمحے کی دہلیز پہ ماریں گے تجھے

پھر سے رکھا ہے تجھے داؤ پہ اے دل ہم نے

ہم کو معلوم ہے اس بار بھی ہاریں گے تجھے

وقت آخر بھی یہ جاں تم پہ ہی اٹکی ہوگی

ہونٹھ جب جب بھی کھلیں گے تو پکاریں گے تجھے