ڈٹے ہیں سامنے دشمن کے اس یقین کے ساتھ

ڈٹے ہیں سامنے دشمن کے اس یقین کے ساتھ

ہمارا رشتہ ہے اس پاک سرزمین کے ساتھ

خدا کے بندوں کی صحبت کو اختیار کرو

نہ جوڑو اپنا تعلق کسی لعین کے ساتھ

میں اس لئے بھی نئے دوست اب بناتا نہیں

کہ خوف باندھ کے رکھا ہے آستین کے ساتھ

زباں پہ پھول مگر دل میں کفر ہو جن کے

ہمارا واسطہ کیا ان منافقین کے ساتھ

اسے بھلا نہیں پائے ہیں آج تک دل سے

چلے تھے راہ محبت میں جس حسین کے ساتھ

یہ مشورہ ہے مرا احمقوں سے دور رہو

جو بیٹھنا ہے تو بیٹھو کسی ذہین کے ساتھ

ستم ظریف برائی بھی لپٹی دامن سے

نشان سجدوں کا بھی ہے تری جبین کے ساتھ

بلندیوں پہ پہنچ کر صدائیں دوں شہزادؔ

مری یہ ضد ہے ہمیشہ سے حاسدین کے ساتھ