دیکھ لے خاک ہے کاسے میں کہ زر ہے سائیں

دیکھ لے خاک ہے کاسے میں کہ زر ہے سائیں

دست دادار بڑا شعبدہ گر ہے سائیں

تو مجھے اس کے خم و پیچ بتاتا کیا ہے

کوئے قاتل تو مری راہ گزر ہے سائیں

شہر و صحرا تو ہیں انسانوں کے رکھے ہوئے نام

گھر وہیں ہے دل دیوانہ جدھر ہے سائیں

پاؤں کی فکر نہ کر بار کم و بیش اتار

اصل زنجیر تو سامان سفر ہے سائیں

شاعری کون کرامت ہے مگر کیا کیجے

درد ہے دل میں سو لفظوں میں اثر ہے سائیں

عشق میں کہتے ہیں فرہاد نے کاٹا تھا پہاڑ

ہم نے دن کاٹ دئے یہ بھی ہنر ہے سائیں