دیکھوں تجھے میں جب بھی تو پر ملال دیکھوں

دیکھوں تجھے میں جب بھی تو پر ملال دیکھوں

تجھ بے خیال کو بھی محو خیال دیکھوں

آنکھوں سے سوچتا ہوں اور چھو کے دیکھتا ہوں

اس خواب خواب کو میں کیسا کمال دیکھوں

کوہسار سے اترتی ندیوں سا حال میرا

اب کیا عروج سوچوں اور کیا زوال دیکھوں

آیا ہے یک بیک یہ کیسا خیال مجھ کو

وہ بھی جواب دیکھے گر میں سوال دیکھوں

روکوں اسے میں کیوں کر جائے تو جا رہے وہ

وہ ہجر دیکھتا ہے اور میں وصال دیکھوں

کس درجہ چاہتے ہیں جاں مجھ پہ وارتے ہیں

یہ لوگ جن کو ثانیؔ میں اک وبال دیکھوں