DhunDhta hun sar-e-sahra-e-tamanna KHud ko

DhūñDhtā huuñ sar-e-sahrā-e-tamannā ḳhud ko

maiñ ki samjhā thā kabhī rūh-e-tamāshā ḳhud ko

apne bachchoñ kī taraf ġhaur se jab bhī dekhā

kitne hī rañgoñ meñ bikhrā huā paayā ḳhud ko

aur kuchh log mire saa.e tale sustā leñ

girtī dīvār huuñ detā huuñ sahārā ḳhud ko

nuur tū mujh se farāvāñ huā mahfil mahfil

ġham nahīñ sham-e-sifat maiñ ne jalāyā ḳhud ko

reg-e-ummīd ke shādāb sarāboñ ke tufail

maiñ ne dekhā hai kabhī sūrat-e-sahrā ḳhud ko

merī azmat kā nishāñ merī tabāhī kī dalīl

maiñ ne hālāt ke sāñche meñ na Dhālā ḳhud ko

merī taḳhlīq mire kaam na aa.ī 'ārif'

maiñ ba-andāz-e-ḳhudā paatā huuñ tanhā ḳhud ko

DhunDhta hun sar-e-sahra-e-tamanna KHud ko

main ki samjha tha kabhi ruh-e-tamasha KHud ko

apne bachchon ki taraf ghaur se jab bhi dekha

kitne hi rangon mein bikhra hua paya KHud ko

aur kuchh log mere sae tale susta len

girti diwar hun deta hun sahaara KHud ko

nur tu mujh se farawan hua mahfil mahfil

gham nahin sham-e-sifat main ne jalaya KHud ko

reg-e-ummid ke shadab sarabon ke tufail

main ne dekha hai kabhi surat-e-sahra KHud ko

meri azmat ka nishan meri tabahi ki dalil

main ne haalat ke sanche mein na Dhaala KHud ko

meri taKHliq mere kaam na aai 'arif'

main ba-andaz-e-KHuda pata hun tanha KHud ko