دھوپ میں تپتا مسافر پیاس کا حل دیکھتا

دھوپ میں تپتا مسافر پیاس کا حل دیکھتا

کب اسے فرصت تھی کہ آگے کا دلدل دیکھتا

کتنے دھاگے منتوں کے باندھے ہیں تیرے لیے

تو کبھی آتا مرے گاؤں کا پیپل دیکھتا

سامنے بیٹھا ہوں اس کے سر جھکائے شرم سے

کہتا تھا تم پاس ہوتی تو مسلسل دیکھتا

اڑ گئے ہیں ہوش ناخن دیکھ اس کے پیر کا

کیا ہی میرا حشر ہوتا گر مکمل دیکھتا

اب سواری پر ہوں آیا ہوں چلا بھی جاؤں گا

وہ اگر ہوتی تو یہ میلہ میں پیدل دیکھتا

گر مری جوگن پہ پابندی نہ ہوتی دہر میں

مورنی جب رقص کرتی سارا جنگل دیکھتا