دل خوگر غم اور لب فریاد ہے خاموش

دل خوگر غم اور لب فریاد ہے خاموش

اے وائے ستم اب ستم ایجاد ہے خاموش

کس منہ سے ہو محرومیٔ قسمت کی شکایت

اک آہ تھی وہ بھی دم فریاد ہے خاموش

پامال محبت ہوں نہ سمجھے گا زمانہ

یوں صورت شبنم مری افتاد ہے خاموش

کیا نالۂ غم میں ہے ترے مرغ گرفتار

کیوں شکوۂ بیداد پہ صیاد ہے خاموش

رہتی تھی نظر جس کی رخ لالہ و گل پر

گوشے میں قفس کے وہ چمن زاد ہے خاموش

کرتا تھا نظرؔ سوز جگر سے جو چراغاں

عرصہ ہوا وہ بندۂ بیداد ہے خاموش