دل کو امید بلائے ناگہاں ہے آج کل

دل کو امید بلائے ناگہاں ہے آج کل

سن رہا ہوں محو گردش آسماں ہے آج کل

کیوں تجھے اے دل تلاش کارواں ہے آج کل

چل تن تنہا کہ وقت امتحاں ہے آج کل

باغباں بھی خوب کہتا ہے چمن کو لوٹ کر

نام اس کا ہی بہار جاوداں ہے آج کل

خار اور رسوا پھرا کرتے تھے ہم کچھ دن ہوئے

آہ کیونکر نیک نامی کا گماں ہے آج کل

لٹ چکی ہے جس گلستاں کی متاع رنگ و بو

مجھ پہ اس کا پاسباں کچھ مہرباں ہے آج کل

ایک دل ٹوٹا ہوا لے کر ہے سرگرداں ندیمؔ

ایک جام مے شریک دوستاں ہے آج کل