دن گئے عشق میں اب ملنے ملانے والے

دن گئے عشق میں اب ملنے ملانے والے

اب نہ لوٹیں گے ترے شہر سے جانے والے

کس کو معلوم کہ اس بت کی کہانی کیا ہے

کتنے قصہ تو بتاتے ہیں بتانے والے

میں نے اکثر نظر انداز کیا ہے ورنہ

اس میں ملتے ہیں کئی رنگ زمانے والے

آنکھوں کے زینے سے میں دل میں اتر جاؤں گا

کب تلک آنکھ چرائیں گے چرانے والے

گرد بیٹھی ہے مرے جسم کے صحراؤں میں

لوگ ملتے ہی نہیں خاک اڑانے والے

داستاں میری فقط میری نہیں ہوتی ہے

اپنا بھی درد ملاتے ہیں سنانے والے