din ki bedard thakan chehre pe le kar mat ja

din kī bedard thakan chehre pe le kar mat jā

bām-o-dar jaag rahe hoñge abhī ghar mat jā

mere purkhoñ kī virāsat kā bharam rahne de

tū havelī ko khulā dekh ke andar mat jā

buuñd bhar dard sañbhaltā nahīñ kam-zarfoñ se

rakh ke tū apnī hathelī pe samundar mat jā

phūTne de mirī palkoñ se zarā aur lahū

ai mirī niiñd abhī chhoḌ ke bistar mat jā

kuchh to rahne de abhī tark-e-vafā kī ḳhātir

tujh ko jaanā hai to jā haath jhaTak kar mat jā

aur kuchh der ye mashq-e-nigah-e-nāz sahī

sāmne baiTh abhī pheñk ke ḳhanjar mat jā

dhuup kyā hai tujhe andāza nahīñ hai 'qaisar'

aable paañv meñ paḌ jā.eñge bāhar mat jā

din ki bedard thakan chehre pe le kar mat ja

baam-o-dar jag rahe honge abhi ghar mat ja

mere purkhon ki wirasat ka bharam rahne de

tu haweli ko khula dekh ke andar mat ja

bund bhar dard sanbhalta nahin kam-zarfon se

rakh ke tu apni hatheli pe samundar mat ja

phuTne de meri palkon se zara aur lahu

ai meri nind abhi chhoD ke bistar mat ja

kuchh to rahne de abhi tark-e-wafa ki KHatir

tujh ko jaana hai to ja hath jhaTak kar mat ja

aur kuchh der ye mashq-e-nigah-e-naz sahi

samne baiTh abhi phenk ke KHanjar mat ja

dhup kya hai tujhe andaza nahin hai 'qaisar'

aable panw mein paD jaenge bahar mat ja