دنوں کو جوڑو مہینوں کو سال کرتے رہو

دنوں کو جوڑو مہینوں کو سال کرتے رہو

ملے جو وقت تو ماضی کو حال کرتے رہو

جو کھو گیا ہے اسے یوںہی رائیگاں نہ کرو

دلوں میں بیٹھے رہو اور ملال کرتے رہو

زمین سنتی نہیں ہے تو آسماں سے کہو

جواب کوئی تو دے گا سوال کرتے رہو

وگرنہ یوںہی گزر جائیں گے یہ روز و شب

اگر ہے جینا تو جینا محال کرتے رہو

اک آئنہ بھی انہیں پتھروں میں رکھ دو کہیں

کبھی کبھار ہی خود سے وصال کرتے رہو

یہاں تمہاری طرف کوئی یوں نہ دیکھے گا

یہ جادوؤں کا نگر ہے کمال کرتے رہو

تمہارے سکھ میں ہمارا بھی سکھ ہے جان من

ہمارا کیا ہے تم اپنا خیال کرتے رہو