دوستو تم نے عجب یہ اہتمام غم کیا

دوستو تم نے عجب یہ اہتمام غم کیا

قتل سورج کر دیا پھر رات بھر ماتم کیا

یاد رکھے گی یہ دنیا اس کو صدیوں دوستو

جان برحق جس نے دے دی سر نہ لیکن خم کیا

کامیابی کس طرح ہوتی ہمیں حاصل بھلا

سوچتے اکثر رہے ہم کام لیکن کم کیا

کارزار زندگی میں خود کو ہم نے دوستو

بارہا شعلہ کیا تو بارہا شبنم کیا

ایک مدت سے ہمارے درمیاں تھی دوستی

اس نے کیسے دشمنی کا فیصلہ اک دم کیا

وحشتیں پلنے لگیں مسعودؔ سارے شہر میں

جب سے ملنا آدمی نے آدمی سے کم کیا