duniya mein hum sa koi sarapa-alam nahin

duniyā meñ ham sā koī sarāpā-alam nahīñ

vo din hī kaun sā hai ki jo roz-e-ġham nahīñ

har dam tire marīz kī hālat ḳharāb hai

dard aaj dil meñ kal se ziyāda hai kam nahīñ

kyā ġham mujhe miTā.e falak DhūñDh DhūñD kar

naam apnā fard-e-nāmvarī meñ raqam nahīñ

gul khil rahe haiñ āmad-e-fasl-e-bahār hai

bulbul chahak rahī hai sarīr-e-qalam nahīñ

ahl-e-qalam hoñ zer-e-nagīñ mulk-e-nazm hai

kyūñkar kahūñ ki sāhib-e-tabl-o-alam nahīñ

kyā kyā aziiz ḳhaak hue mil ke ḳhaak meñ

lekin yahāñ kisī kā kisī ko bhī ġham nahīñ

hotī hai ġhaib se mirī imdād ai falak

minnat-kash-e-ināyat-e-ahl-e-karam nahīñ

yārān-e-raftagāñ se bahut jī ko uns hai

milte agar musāfir-e-mulk-e-adam nahīñ

gar dard-e-dil yūñhīñ hai salāmat to ek din

'raushan' ye yaad rakhnā ki duniyā meñ ham nahīñ

duniya mein hum sa koi sarapa-alam nahin

wo din hi kaun sa hai ki jo roz-e-gham nahin

har dam tere mariz ki haalat KHarab hai

dard aaj dil mein kal se ziyaada hai kam nahin

kya gham mujhe miTae falak DhunDh DhunD kar

nam apna fard-e-namwari mein raqam nahin

gul khil rahe hain aamad-e-fasl-e-bahaar hai

bulbul chahak rahi hai sarir-e-qalam nahin

ahl-e-qalam hon zer-e-nagin mulk-e-nazm hai

kyunkar kahun ki sahib-e-tabl-o-alam nahin

kya kya aziz KHak hue mil ke KHak mein

lekin yahan kisi ka kisi ko bhi gham nahin

hoti hai ghaib se meri imdad ai falak

minnat-kash-e-inayat-e-ahl-e-karam nahin

yaran-e-raftagan se bahut ji ko uns hai

milte agar musafir-e-mulk-e-adam nahin

gar dard-e-dil yunhin hai salamat to ek din

'raushan' ye yaad rakhna ki duniya mein hum nahin