ایک گھر میں رہتے ہیں دوسرے کی چاہت میں

ایک گھر میں رہتے ہیں دوسرے کی چاہت میں

مشغلہ ہے یاروں کا آج کل محبت میں

سانس سانس مرتے ہیں اس کو یاد کرتے ہیں

کیا کچھ اور ہوتا ہے سالک و ریاضت میں

دیکھیے تو سب دنیا مست الست لگتی ہے

جانیے تو ہر انساں مبتلا ہے دہشت میں

شام کے چراغوں سے روشنی کے باغوں سے

ہم کہاں نکل آئے اک اداس حیرت میں

زندگی کی ارزانی مرگ کی فراوانی

آدمی کی نادانی روح ہے مصیبت میں

کتنے کام کرنے ہیں امتحاں گزرنے ہیں

جی رہے ہو تم ثانیؔ کس فریب فرصت میں