ایک گہر آنسو کا نہ چھوڑا دل کی جوت جگانے کو

ایک گہر آنسو کا نہ چھوڑا دل کی جوت جگانے کو

یاد کسی کی خالی کر گئی راتوں رات خزانے کو

اڑ جاتی ہے گیت سنا کر جب مجھ کو کوئی چڑیا

میں بھی ساتھ چلا جاتا ہوں دور تلک پہنچانے کو

اپنی جگہ ہر لفظ علامت شعر کے تار و پود میں ہے

الگ الگ کر کے مت دیکھو اک اک تانے بانے کو

پتے پتے بوٹے بوٹے پر لکھا ہے نام اس کا

میں بھی چو رستے پر کھڑا ہوں اپنا پتہ بتانے کو

میں تو رونے ہنسنے والا ایک تماشائی ہوں بس

مجھ سے اور تعلق کیا ہے زیبؔ مرے افسانے کو