فکر کر تعمیر دل کی وہ یہیں آ جائے گا

فکر کر تعمیر دل کی وہ یہیں آ جائے گا

بن گیا جس دن مکاں خود ہی مکیں آ جائے گا

خود بھی وہ چالاک ہے لیکن اگر ہمت کرو

پہلا پہلا جھوٹ ہے اس کو یقیں آ جائے گا

کون سا ہم روز روز اس کو بلاتے ہیں یہاں

بے مروت ہے مگر اتنا نہیں آ جائے گا

ہم سے مل لینے کا مطلب یہ نہیں ہو گا کہ اب

ہر کوئی اس کو بلا لے ہر کہیں آ جائے گا

زخم دل تو سات پردوں میں چھپا ہو گا کہیں

اور سب کے سامنے داغ جبیں آ جائے گا

ہم تو سمجھے تھے کہ اس لشکر کشی سے حسن کا

کچھ علاقہ اور بھی زیر نگیں آ جائے گا

اب تو جیسے خود بھی آنہ چاہتا ہے وہ ظفرؔ

گھر گلی ہوٹل جہاں چاہو وہیں آ جائے گا