غیر ہم کو کہاں گوارا ہے

غیر ہم کو کہاں گوارا ہے

جو ہمارا ہے بس ہمارا ہے

میری دنیا میں روشنی کا سبب

ایک چہرہ ہے اک ستارہ ہے

میں تجھے کیسے چھوڑ سکتی ہوں

تو مرا آخری سہارا ہے

آپ بے وجہ یاد آئے ہیں

آپ کو بے سبب پکارا ہے

ساتھ رہتے تو ٹھیک تھا لیکن

آخری فیصلہ تمہارا ہے

ہم نے اک شخص کی تمنا میں

کل جہان نشاط ہارا ہے

پوچھتا ہی نہیں کوئی اب تو

مرنے والے کو کس نے مارا ہے

روح سرشار ہوتی ہے سن کے

آپ کا نام کتنا پیارا ہے

ہم نے دیکھا ہے بارہا چکھ کے

اشک کا ذائقہ تو کھارا ہے