گر ادھر چلے آتے تم کسی بہانے سے

گر ادھر چلے آتے تم کسی بہانے سے

ہم نجات پا جاتے دو گھڑی زمانے سے

جب کبھی اکیلے میں پاس آ کے بیٹھی ہے

لگ کے خوب روئے ہیں زندگی کے شانے سے

صرف اشک دے کر ہی تم خرید سکتے ہو

ہم نکل کے آئے ہیں درد کے خزانے سے

شب کو شب بنانے کے اور بھی شرائط ہیں

رات ہو نہیں جاتی چاند جگمگانے سے

درد تھا قرینے سے چھپ کے رو لئے ہوتے

کیا ملا بھلا اس کو مدعا بنانے سے

ایک دن ستاروں سے مل کے ان سے پوچھیں گے

اوب کیوں نہیں جاتے روز جھلملانے سے

یے الگ کہ آخر میں ہم ہی جیت جائیں گے

فائدہ نہیں لیکن بات اب بڑھانے سے

عمر بھر کی رندی نے بس یہی سکھایا ہے

پیاس اور بڑھتی ہے پیاس کو بجھانے سے

دکھ تو ہے حسیں منظر آنکھ سے ہوا اوجھل

نیند کھل گئی لیکن خواب ٹوٹ جانے سے