گردش سیارگاں کا پیش و پس کھلتا نہیں

گردش سیارگاں کا پیش و پس کھلتا نہیں

یہ مرے اطراف میں پھیلا قفس کھلتا نہیں

آب‌ و آتش اور خاک و باد ہیں میرا وجود

اور عناصر پر کہاں چلتا ہے بس کھلتا نہیں

خواب و خواہش کے علاوہ میں اسے کیا نام دوں

جو مرے احساس کو کرتا ہے مس کھلتا نہیں

دھوپ چھاؤں چکھتے چکھتے ذائقہ جاتا رہا

زندگی زہر ہلاہل ہے کہ رس کھلتا نہیں

اک تسلسل ہے مسافت کا رگ و پے میں رواں

میرے پاؤں سے بندھا شور جرس کھلتا نہیں

سیل نادیدہ کی زد میں ہیں مرے ماہ و نجوم

کس طرف کو ہیں رواں یہ خار و خس کھلتا نہیں

میرے روز و شب نہیں اطہرؔ کسی ترتیب میں

اب کسی ابجد سے باب دسترس کھلتا نہیں