ہے نقش درم جو نقش پا ہے
آپ آتے تو گھر درم سرا ہے
دل جلوہ ترا دکھا رہا ہے
شیشہ یہ مرا پری نما ہے
سلطان جہاں ہے جو گدا ہے
تیمور ہر اک شکستہ پا ہے
انساں بھی قدرت خدا ہے
کیا سنگ کو بت بنا دیا ہے
شیریں ہے دہن کرو شکر خند
ہنسنے میں تمہاری اک مزا ہے
مضمون پروانے بن کے آئیں
شبدیز قلم چراغ پا ہے
یاران گزشت گاں سے ہے انس
زندہ مردوں پہ مر رہا ہے
آیا نہیں خود فروش میرا
گویا مجھے مول لے لیا ہے
وہ رشک بہار و غیرت گل
گلگشت چمن کو جو گیا ہے
گلزار ہوا ہے پانی پانی
بلبل پانی کا بلبلا ہے
جو چاہئے عشق میں کیا وہ
ہم مر گئے کہئے مرحبا ہے
ہے جھوٹا کہوں جو راست ہے قد
یہ توسن حسن الف ہوا ہے
منہ جس نے دیا وہ رزق دے گا
گویا یہ دہاں آسیا ہے
توبہ کا نہ در ہو بند یا رب
جب تک در میکدہ کھلا ہے
ہے شیشۂ سبز گرم قلقل
طوطی مستوں کا بولتا ہے
کیا جسم ہے صاف اس پری کا
گویا قد آدم آئنہ ہے
بیگانہ کوئی نظر نہ آیا
آئنہ بھی صورت آشنا ہے
کیا خوف گنہ وزیرؔ کو ہو
حامی سلطان انبیا ہے
مأخذ:
Daftar-e-Fasahat (Pg. ebook-231 page-215)
-
مصنف:
خواجہ محمد وزیر
-
- اشاعت: 1847
- ناشر: مطبع مصطفائی، لکھنو
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.