ہے پیرہن کا وہ اپنے فقط نقیب بٹن

ہے پیرہن کا وہ اپنے فقط نقیب بٹن

اگر زبان میسر ہو تو خطیب بٹن

صدائے دل بھی وہ سنتا ہے گو طبیب بٹن

سبب یہ ہے کہ بہت دل کے ہے قریب بٹن

لباس شوخ پہ زیبا تو خوش نصیب بٹن

لگے غریب کے کالر پہ تو غریب بٹن

لگاتے وقت گرا ہاتھ سے چھٹک کر جب

تو اس کو چھوڑ دیا کہہ کے کم نصیب بٹن

جو ٹوٹ کر کبھی کپڑوں میں لگ نہیں پاتے

انہیں کو کہتے ہیں دنیا میں بد نصیب بٹن

نظر وہ آئیں سبھی سے الگ اسی دھن میں

لگا کے آئے ہیں کرتے میں کچھ عجیب بٹن

ہوس بھری ہوئی نظریں تو چبھ نہیں پاتیں

کھلے لباس کو ہوتا اگر نصیب بٹن

کسی فقیر کے جب پیرہن کا ساتھ ملا

تو اس کو کہنے لگے سب کہ ہے نجیب بٹن

ارادہ جیسے کیا اس نے حق بیانی کا

گلے میں ڈال کے چلنے لگا صلیب بٹن

بیان کیسے کروں میں تمہاری عظمت کا

ہر اک لباس کا ہوتا ہے تو منیب بٹن

لباس میرا ترے بن ہے نا مکمل تو

خراج پیش ہے تجھ کو مرے حبیب بٹن

جو بے خیالی میں ہونٹوں سے لگ گیا اعجازؔ

تو اس نے کہہ دیا میرا ہے اب رقیب بٹن