ہم آج تک اگرچہ اسے پا نہیں سکے

ہم آج تک اگرچہ اسے پا نہیں سکے

تا حال اس خیال سے باز آ نہیں سکے

پرہیز خود علاج ہے یہ سامنے کی بات

ہم اپنے آپ کو کبھی سمجھا نہیں سکے

کی اس نگاہ مست نے وہ پیشکش کہ ہم

توبہ کے باوجود بھی ٹھکرا نہیں سکے

دوران راہ کوئی فرشتہ صفت بزرگ

آئے ضرور تھے ہمیں بہکا نہیں سکے

اصرار سے بلائے گئے تھے جہاں وہاں

ہم اپنی کاہلی کے سبب جا نہیں سکے

دونوں نے بے وفائی نہیں کی تمام عمر

گو ایک دوسرے کو ہم اپنا نہیں سکے

مژدہ کہ اس نشست میں انور شعورؔ بھی

تشریف لا رہے تھے مگر لا نہیں سکے