hum waqt ke alaw mein barson jale miyan

ham vaqt ke alaav meñ barsoñ jale miyāñ

lo dil kī raakh chhoḌ ke ham bhī chale miyāñ

chāroñ taraf se TuuT rahā hai havā kā shor

bastī meñ ik charāġh kahāñ tak jale miyāñ

ik dūsre ke qatl meñ ham sab sharīk haiñ

pūchho to koī naam kisī kā na le miyāñ

darvāza band kar ke sulagnā paḌā mujhe

kyuuñ mere ghar kī aag se bastī jale miyāñ

kab tak khaḌe rahoge daraḳhtoñ kī aaḌ meñ

kyā jaane kitnī der ye āñdhī chale miyāñ

vo din ga.e ki rahte the ham āsmān par

kaTtī hai raat TuuTī huī chhat tale miyāñ

'qaisar' bharī-bahār se rūThe rahe bahut

ab fasl jā rahī hai lagā lo gale miyāñ

hum waqt ke alaw mein barson jale miyan

lo dil ki rakh chhoD ke hum bhi chale miyan

chaaron taraf se TuT raha hai hawa ka shor

basti mein ek charagh kahan tak jale miyan

ek dusre ke qatl mein hum sab sharik hain

puchho to koi nam kisi ka na le miyan

darwaza band kar ke sulagna paDa mujhe

kyun mere ghar ki aag se basti jale miyan

kab tak khaDe rahoge daraKHton ki aaD mein

kya jaane kitni der ye aandhi chale miyan

wo din gae ki rahte the hum aasman par

kaTti hai raat TuTi hui chhat tale miyan

'qaisar' bhari-bahaar se ruThe rahe bahut

ab fasl ja rahi hai laga lo gale miyan