ہمیں گماں کہ ابھی وہ چراغ جلتا ہے

ہمیں گماں کہ ابھی وہ چراغ جلتا ہے

نصیب ہو تو ہواؤں کا رخ بدلتا ہے

ہمیں گماں کہ سلگتی ہوئی شبوں میں ابھی

ہمارا خواب کسی آنکھ میں پگھلتا ہے

ہمیں گماں کہ ابھی اوس کے کنارے پر

کہیں پہ نیند میں جھونکا ہوا کا چلتا ہے

ہمیں گماں کہ جزیرے سے آ رہی ہے صدا

اک آفتاب ابھی جھاڑیوں میں ڈھلتا ہے

ہمیں گماں کہ ترے پاؤں پر پھسلتے ہوئے

اس آبشار کا پانی ابھی اچھلتا ہے

ہمیں گماں کہ تری یاد کے درختوں سے

ابھی فراق رتوں کا دھواں نکلتا ہے

ہمیں گماں کہ کوئی عشق کے مرض میں ابھی

چھپا چھپا کے سرہانے پہ خون اگلتا ہے

ہمیں گماں کہ ابھی چاندنی کا سازندہ

کسی کے پاؤں کی آہٹ پہ سر بدلتا ہے

ہمیں گماں کہ شفقؔ پتھروں کی کائی پر

کسی کا برف سا پاؤں ابھی پھسلتا ہے