ہمیں اس بھیڑ سے آگے نکلنے کون دیتا ہے

ہمیں اس بھیڑ سے آگے نکلنے کون دیتا ہے

کبھی جو گر پڑو تو پھر سنبھلنے کون دیتا ہے

کبھی دنیا کے پیچ و خم کبھی گھر کی پریشانی

گھڑی بھر ہی سہی ہم کو بہلنے کون دیتا ہے

ہماری خامشی پر بن رہے ہیں لاکھوں افسانے

مگر جو زہر ہے اندر اگلنے کون دیتا ہے

اندھیروں کی سیاست سے سبھی بیزار ہیں لیکن

اجالے بانٹنے والوں کو جلنے کون دیتا ہے

جکڑ رکھا ہے ہم کو رات دن کی آپا دھاپی نے

ہمیں اس قید سے باہر نکلنے کون دیتا ہے