haqiqat apni bas itni hi jaanta hun main

haqīqat apnī bas itnī hī jāntā huuñ maiñ

jo tai huā na kisī se vo marhalā huuñ maiñ

figār qalb-o-jigar haiñ to ḳhūñ-chakāñ āñkheñ

huā ye haal magar phir bhī be-vafā huuñ maiñ

na kar muġhannī-e-nādāñ fuzūl zaḳhma-zanī

shikasta-sāz huuñ fariyād-e-be-sadā huuñ maiñ

atā vo hosh-rubā mai ho chashm-e-mai-gūñ se

koī ye kah na sake phir ki pārsā huuñ maiñ

ye ḳhūn-e-dil se chaman sīñchne kā ajr milā

nigāh-e-ahl-e-chaman meñ khaTak rahā huuñ maiñ

hasīn ḳhvāb dikhā kar fareb-e-lutf na de

hasīn ḳhvāboñ kī ta.abīr jāntā huuñ maiñ

vo jāñ-gusil hī sahī phir bhī hai ġham-e-jānāñ

na pochhiye jo maza is meñ pā rahā huuñ maiñ

milī bhī chashm-e-haqīqat-nigar to kyā hāsil

zabāñ pe lā nahīñ saktā jo dekhtā huuñ maiñ

haqiqat apni bas itni hi jaanta hun main

jo tai hua na kisi se wo marhala hun main

figar qalb-o-jigar hain to KHun-chakan aankhen

hua ye haal magar phir bhi be-wafa hun main

na kar mughanni-e-nadan fuzul zaKHma-zani

shikasta-saz hun fariyaad-e-be-sada hun main

ata wo hosh-ruba mai ho chashm-e-mai-gun se

koi ye kah na sake phir ki parsa hun main

ye KHun-e-dil se chaman sinchne ka ajr mila

nigah-e-ahl-e-chaman mein khaTak raha hun main

hasin KHwab dikha kar fareb-e-lutf na de

hasin KHwabon ki tabir jaanta hun main

wo jaan-gusil hi sahi phir bhi hai gham-e-jaanan

na pochhiye jo maza is mein pa raha hun main

mili bhi chashm-e-haqiqat-nigar to kya hasil

zaban pe la nahin sakta jo dekhta hun main