ہر بار ابھرتا ہوں تو کیا دیکھتا ہوں میں (ردیف .. ے)

ہر بار ابھرتا ہوں تو کیا دیکھتا ہوں میں

کچھ اور خیالات میں گہرائی ہوئی ہے

کہنے کو سہی ساتھ ہے میرے وہ ابھی تک

حجرے میں ابھی تک تو بہار آئی ہوئی ہے

میں کتنے غزالوں کا کروں پیچھا ابھی اور

کہہ پاؤں ترے ہجر کی بھرپائی ہوئی ہے

جو عہد تمہارا ہے کہ ہم باز نہ آئیں

ہم نے بھی تماشے کی قسم کھائی ہوئی ہے

تینتیس برس کس کے کہو ساتھ گزارے

جو حال ہی میں خود سے شناسائی ہوئی ہے

ترکشؔ وہ کوئی اور ہے کرتا ہے سخن جو

تجھ سے تو فقط قافیہ پیمائی ہوئی ہے