ہر دل کے مقدر میں محبت نہیں ہوتی

ہر دل کے مقدر میں محبت نہیں ہوتی

ہر شخص کے حصہ میں یہ نعمت نہیں ہوتی

مل جائے محبت کا جب اے دوست سہارا

پھر اور سہارے کی ضرورت نہیں ہوتی

اس دن مجھے لگتا ہے کوئی پاپ ہوا ہے

جس دن ترے کوچہ کی زیارت نہیں ہوتی

کرتے ہیں گلہ تم سے تمہیں اپنا سمجھ کے

غیروں سے تو اے دوست شکایت نہیں ہوتی

جلنا ہے پتنگے تو تو جل سوز جگر سے

عاشق کو تو آتش کی ضرورت نہیں ہوتی

کس درجہ ہے مصروف نئے دور کا انساں

خود سے بھی اسے ملنے کی فرصت نہیں ہوتی

بن تیرے کروں زیست میں توبہ مری توبہ

مجھ سے تو مری جان یہ جرأت نہیں ہوتی

کچھ کام نہیں آتی ہے محنت بھی بشر کی

جب تک مرے مولیٰ تری رحمت نہیں ہوتی

محنت سے کما کے تو صداؔ اپنی گزر کر

جو مفت ملے اس میں تو برکت نہیں ہوتی