حسین تیری طرح میری زندگی نہ رہی

حسین تیری طرح میری زندگی نہ رہی

ترے بغیر کسی شے میں دل کشی نہ رہی

اب اس اندھیرے کا انجام دیکھیے کیا ہو

کہ زندگی میں محبت کی روشنی نہ رہی

ترے ہی غم کو سمجھ لوں نہ کیوں متاع حیات

خوشی کا کیا ہے بھروسہ رہی رہی نہ رہی

خدا کے واسطے تو ہی بتا بہار چمن

یہ بات کیا ہے جو پھولوں میں تازگی نہ رہی

تری نگاہ کرم سے تھا اعتبار حیات

ترے بدلتے ہی بس جیسے زندگی نہ رہی

وہی ہے چاند وہی آسماں وہی تارے

مگر جہاں میں وہ پہلی سی روشنی نہ رہی

اٹھا جو پردۂ رخ اب تو کیا اٹھا شاداںؔ

نگاہ شوق میں جب تاب دید ہی نہ رہی